XOSÉ VIZOSO E A ILUSTRACIÓN DE LIBROS PARA NENOS

    Coñezo polo miúdo o labor do artista mindoniense Xosé Vizoso. Somos amigos dende hai anos. Xuntos vimos compartindo inquedanzas no Instituto Galego de Información. Sei do seu facer como diseñador gráfico, creador de pezas de cerámica, ilustrador, escenógrafo. Coñezo os seus carteis e as súas pinturas murais. Nada lle é alleo no eido da plástica.
    Ademais das súas tarefas de diseño en Edicións do Castro, ilustrou con acerto diversas obras, incluídos tres libros meus para nenos. É posiblemente nesta faceta onde mellor se pode calibrar a arte de Vizoso no que se refire á ilustración. Os nenos que el pinta, con liña moi precisa, non son híbridos nin intemporais. En xogos, vestimenta, calzado, xestos e andainas queda sempre moi definido se son nenos da vila ou da aldea, de hoxe ou de hai trinta ou corenta anos. Ubíacaos perfectamente no espacio e no tempo. E sempre se ve neles unha retranca, unha gracia, un sorrir e un actuar moi vitais, moi nosos. En suma, achégase con amor e con arte ó mundo do nenos. E cónstanos que acerta amplamente, pois temos comprobado como os nenos lectores de hoxe en día se senten engaiolados con estes debuxos.

Xosé Neira Vilas

 Mondoñedo, 1950. Son ilustrador, cartelista e deseñador de  cerámica. O escultor valenciano Juan Puchades, o meu  profesor de debuxo no Instituto de Mondoñedo, dirixiu os  meus primeiros pasos no mundo da arte. En 1988  incorporeime ao gabinete de deseño da nova cerámica de  Sargadelos. Alí adquirín unha ampla formación artística  baixo a influencia de Luís Seoane e, sobre todo, de Isaac  Díaz Pardo. Tamén alí desenvolvín a miña obra máis valiosa: o deseño da amplísima serie de pezas de cerámica de Sargadelos. Recibín diversos premios e recoñecementos pola miña producción artística. Na actualidade, ademais da miña actividade como ilustrador, cartelista e deseñador de exposicións, son o principal responsable do deseño da sección de cerámica de Sargadelos e da ilustración de libros, cubertas e carteis de Edicións do Castro.