BIG-BANG
      1. Ecdisis. Marabilla de mutación. Logo da ninfa, o imago. Logo da alquimia demorada o movemento príncipe, o bater de ás de efémera.
      2. Diapausa. Torpor secuencial. Mensaxe antiga nas gavetas das bases nitroxenadas. Soño programado e circadiano.
      3. Tanatocrese. Morte simulada de alacrán ventre ó sol. Astucia de panzer coleóptero. Gala subacuática de ditisco namorada.
      4. Tropismo. Reacción de orientación. Flexibilidde de fluídos e de hormonas. Delirio eléctrico de clacio.
      Corolario: Big-bang dun mesmo. Curiosidade endóxena. Asimilar o diferente. Procurar a contradcción, o motor das nosas vidas. Dreams. Labyrinths. Incantation. The worlds of the saman. Expansión (ananas brancas, viaxeiras azuis, xigantes vermellas, ocos negros). Tolerancia. Big-bang dun mesmo. Tolerancia.

Xavier Queipo

Ola. Chámome Fausto Castiñeira Isorna, pero no "mundillo" das artes gráficas coñéceseme por Fausto. Nacín en Catoira o primeiro de novembro de 1961, na mesma data que saíu á rúa o número 1 dos Catro Fantásticos. Empecei publicando os meus traballos nas marxes dos meus libros de texto, ata que creei a miña primeira revista de historietas, Diplodocus, con Manuel Quintáns, na que traballaron creadores mundialmente famosos (¿). A esta sucedéronlle nos anos 80 Valiundiez e Das Cápital, codirixidas con Arturo López Regueiro. Colaborei tamén noutras como Coordenadas, Aula Aberta ou Tintimán. Unha vez falecida a "Movida Galega" abrín o meu estudio de ilustración e deseño gráfico, que funciona na actualidade gracias á confianza que me dispensan entidades tan importantes como o Grupo Chévere, Milladoiro, a Sala Nasa, a Compañía de Teatro do Aquí, Edicións Positivas, Sotelo Blanco, etc.