Eu son unha desas bolboretas que despregan as súas ás revoloteando polas rúas e prazas. Así dicía o poema, alomenos. Pois ben, cansa de tantos ruídos na cidade, de ler nos xornais catástrofes, inxustizas e malas novas botei a voar seguindo o rebumbio que podedes observar. E aquí estou vendo como mozos e mozas de distintas razas están a compartilo todo neste fermoso recuncho da natureza. Ata os meus amigos, os paxaros, semellan turbados. Sen perder un minuto máis, vou pasar a rentes destes xoves e bebe-las súas cores diferentes. Cando volva á cidade, irei pousando un chisco da súa ledicia naqueles lugares grises dominados pola intolerancia, a tristura e maila incomunicación. Este será o labor dunha modesta bolboretiña que escapou dun libro de poemas, sufriu a néboa na cidade e entrou na cor desta ilustración para sentirse un pouco mellor. Antonio García Teijeiro

Chámome José Carreiro Montero e nacín no ano 1954 en Vigo. A miña actividade profesional é a de debuxante; como tal colaborei como humorista gráfico en distintos medios de comunicación, nos xornais galegos Faro de Vigo, La Voz de Galicia... e na Televisión de Galicia... Como ilustrador tamén colaborei con distintas editorias, Ir Indo, Edelvives...