infantil

"Había unha vez un país"

Paco López-Barxas e Kiko da Silva propoñen unha nova visión da cidade no libro "Sar, Sarela, e os monstros de Compostela", de Kalandraka

M. DOPICO . SANTIAGO

Paco López-Barxas, fotografado mentres sinala as gárgolas dun dos edificios da cidade vella de Santiago

"Había unha vez un país chamado Galicia,/ que tiña unha pequena cidade como de xoguete./ Esta cidade chamábase Compostela"... Así, con todo un convite para seguir lendo, comeza Sar, Sarela e os monstros de Compostela, o novo álbum infantil que acaba de editar Kalandraka. O escritor Paco López-Barxas e o debuxante Kiko da Silva son os autores deste libro, que forma parte da Biblioteca Infantil do Consorcio de Santiago.

Dous gatos irmáns, Sar e Sarela, son os protagonistas deste relato, que conduce o lector cara a varios edificios emblemáticos do núcleo histórico de Compostela, convidándoo a descubrir os gardiáns dos tellados: as gárgolas.

"Encargáronme un conto no que a cidade de Santiago fose a protagonista... Creei dous personaxes que puidesen dar a coñecer aspectos da cidade pouco visibles, nos que non reparamos a miúdo, como as gárgolas. Pensei, por iso, nos gatos, porque son animais que andan polos tellados...", explicou López-Barxas.

"A figura da gárgola ten interese para os nenos, porque as gárgolas son monstros. Pero tamén son xoias da arquitectura, que representan o máis claro exemplo de liberdade creativa dos canteiros anónimos da cidade. Ninguén lle dicía ao canteiro como tiña que facer a gárgola. Alén diso, a pesar de ser monstros, as gárgolas son boas, porque defenden os edificios monumentais da humidade", engadiu.

Así, o conto propón unha visión alternativa sobre a monstruosidade. Do mesmo xeito que sobre a choiva. Sar e Sarela aproveitan un día chuvioso para divertirse paseando pola cidade. "Compostela é presentada no conto como unha pequena Venecia. Sarela ten un soño, que tamén é realidade...", subliñou López-Barxas.

"O libro está moi ben ilustrado por Kiko, que o soubo interpretar. Non sería o mesmo sen os seus debuxos...", reiterou o autor, que hai un par de anos debutou na literatura infantil con O ladrón de paxaros, de Baía Edicións. "Motivoume escribir para nenos porque é moi distinto a facelo para adultos, en canto á procura de modos de adestrar a imaxinación e a creatividade dos nenos... Quería contar os contos que non lles contei no seu momento aos meus fillos por non atopar o sosego que agora teño", dixo.