Xabier P. Docampo preséntanos dúas historias que teñen como protagonistas aos animais: Roxelio e a couza conta un encontro entre un neno e un bechiño, unha couza, que vive alimentándose da madeira, e como xorde entre eles unha relación de complicidade; A casa do porco bravo narra unha historia de familia na casa dos xabaríns cando se presenta unha situación de emerxencia. Mentres o pai e a nai discuten sen chegar a ningún acordo, son as crías, as pequenas bacoriñas, as que atopan unha solución práctica.
O autor emprega unha linguaxe sinxela para contar estas historias lineais, que resultan, polo momento, as máis axeitadas para nenos e nenas pequenos. As ilustracións, moi persoais, foron feitas por unha ilustradora ata agora descoñecida: Ánxeles Ferrer.