Este volume está constituído por tres contos, dous deles xa publicados con anterioridade:
"Neve na Amaía" (1992), conta a historia de Berta, unha nena que vive na Amaía coa súa avoa e que recibe desta o encargo de manter aceso o lume da lareira. Para conseguilo deberá visita-lo seu veciño Tomé, a fonte da auga que canta, a terra que soña e o vento que pinta. Para superar tódalas probas contará coa axuda do grilo.
"Chave de Ponte, Chave de Carballo" (1995) céntrase na viaxe que emprende Minia por estas dúas aldeas preto de Bastavales para atopa-lo seu gatiño Fran e traelo de novo para a súa casa.
"O trasno de Alqueidón", é un conto inédito que dá título ao volume. Nel cóntase cómo uns nenos, aconsellados pola súa avoa, descobren un trasno na súa casa e ensínanlle a contar.
Os tres relatos teñen en común a localización xeográfica: o val da Amaía, preto de Santiago de Compostela; e temporal: os imprecisos anos do pasado cando non había televisión. Os seus protagonistas son nenos que se ven inmersos en aventuras máis ou menos fantásticas. Son tres historias sinxelas e axeitadas a un público infantil que comeza a se introducir no mundo da lectura.