El-Rei Artur vai de caza cos seus cabaleiros e mata unha osa. Persegue logo un cervo branco, que se transforma no Cabaleiro do Cervo e lle reprocha que queira matar un animal branco, pois son sagrados, polo que o ha matar a el se dentro de un ano e un día non lle sabe contestar o enigma de qué é o que máis desexan as mulleres. Como non atopa resposta satisfactoria en sabios, soldados nin cabaleiros de Camelot, Artur decide saír en busca dela.
Nunha ponte atopa a Galván, que trata de impedirlle o paso, pero como sae derrotado ten que acompañar ao rei na súa procura. Chegan a unha vila, onde todos dan respostas condicionadas polos seus intereses. Alí, o rei, conmovido ao ver encadeado un osiño (fillo da osa que el matara) para actuar nun espectáculo, compra a súa liberación. Nun cruzamento baten cunha muller feísima, a Abominable Dama, que lles di a resposta a cambio de que Galván acepte casar con ela. Cofírmao o Cabaleiro do Cervo: "As mulleres queren poder gobernar a súa vida" é a resposta correcta. Esfúmase entón o cabaleiro e aparece a Abominable Dama reclamando casar con Galván. A noite de vodas, un bico deste transfórmaa en fermosa e ao deixarlle a ela a decisión de manter a beleza de día ou de noite, rómpese todo o encantamento: é a fermosísima Dama Ragnell.
Esta peza de teatro, interesante experiencia de colaboración entre unha das máis recoñecidas escritoras galegas e os dous integrantes do Grupo de Títeres Cachirulo, ábrese cunha breve caracterización dos personaxes e péchase cun apéndice, "Agardando a volta de Artur", no que se relatan os episodios máis relevantes da tradición narrativa artúrica.