Xosé é un rapaz de tres anos que vive no Ventorrillo, a parte alta da vila onde sempre sopra moito o vento. Ten dous irmáns maiores que ás veces non o admiten nos seus xogos. Por iso quere e non quere xogar con eles. Un día de moito ventear non daba nin andado e mesmo foi a rolos polo campo abaixo levado polo vento. Desde aquela o medo non o deixa saír fóra xogar. Pero na casa abúrrese.
Ata que viu un rapaz xogando cun papaventos. Entón pensou en facerse amigo do vento e brincar con el. O seu novo amigo levoulle a pucha dun lado para outro. Era divertido. Pero o mellor foi cando xogou cunha corda e unha vella cana de pescar, como se fose un cabalo. O seu amigo ergueuno no aire e levouno a dar unhas voltas. E a xente fregaba os ollos abraiada porque non lle parecía certo o que vía.