María Canosa: Xiana, a nena pirata
Ilustracións de Noemí López
Col. Ler é Vivir. Serie Laranxa. Everest Galicia. A Coruña, 2012

Xiana é a capitá do Vagalume, o seu barco pirata no que navega cada noite, dende que se agocha o sol ata que sae de novo co mencer, guiándose pola luz dos faros e a lúa. É unha pirata diferente: a única pirata do mundo que ademais de parche usa lentes e non leva canóns nin fusís senón redes, bicheiros ou nasas, nin pano ou sombreiro pirata senón un casco viquingo. Este ano está preocupada pois vai acabar o verán e aínda non atopou tesouro ningún. O que busca son estrelas de mar de colores, pois é a encargada da colección do seu colexio.
Ten un papagaio chamado Rodolfo, que lle trouxo Roi dunha illa deserta. Non sabía falar e faltáballe unha pata. Ata que ela lle colocou unha de pau e dende ese día puido voar: voa diante do barco informando á súa capitá de todo o que ve. Cando xa desesperaba de conseguir algunha estrela, atoparon a balea amiga Petronila, que levou o Vagalume no seu chorro de auga ata un lugar no que se somerxeu e logo botou polo chorro estrelas de cores, cabaliños con luz e caramuxas cantando. Xiana capturou nas súas redes cinco estrelas e outros animais exóticos. E regresaron contentos cara á escola de piratas. Outro verán máis podían cantar aquilo de "Misión pirata cumprida!".
Álbum cun dinámico traballo de ilustración que reforza o atractivo do texto.