Verlioka, un terrible xigante con barba longuísima, o nariz ganchudo e un ollo só, apodérase dunha rapaciña cando os avós lle encomendan ir espantar os paxaros para que non coman os chícharos, e logo da súa irmá, ao se ir interesar pola sorte desta. A avoa tamén se atopa co xigante cando chega á horta na busca delas, mais ofrécelle resistencia pelexando e cae ao chan, rendida. Cando o avó acode para saber o que ocorrera, emprende unha marcha co seu bastón de ferro á busca do xigante. Polo camiño únenselle en ringleira unha oca desplumada, o esqueleto dun mil razas, un burro rabón e unha cabra cun corno si e outro non. Agachados na cabana do xigante, cagándolle na boca, coa dentadura do mil razas, enredándolle o rabo entre as pernas o burro, cunha cornada da cabra e mais o bastón de ferro do ancián, vénceno e apodéranse da chave do calabozo onde encerraba as cativas, deixándoo a el pechado alí para sempre. Desde aquela comeron chícharos a moreas nos almorzos, nas comidas e nas ceas.
E o burro, o mil razas, a cabra e a oca rifaron os bigotes e as barbas de Verlioka.
Con moi pouco texto, as ilustracións rotundas deste álbum facilitan unha doada lectura visual dos máis pequenos.