Charo Pita: Velliñas
Ilustracións de Fátima Afonso
Col. O. OQO Editora. Pontevedra, 2009

Había unha vez dúas velliñas que só podían comer sopa de auga, á que os domingos lle engadían un fideo. Un día, Antea atopou unha faba que, cando ía botarlla á sopa, escorregou ata o chan, e dela xurdiu unha planta que medrou, chegando ao ceo. Antea subiu pola fabeira ata dar cun muíño do que saían saboroso manxares, dos que se fartou. De volta na casa, cando llo contou a Filipa, quixo esta tamén matar a fame e subiron as dúas. Mais non tivo forzas para chegar Filipa, que caeu ao chan e aterrou pola cociña, ciscada en anacos. Con fariña, leite, ovos e azucre que lle emprestou unha veciña, fixo Antea unha masa coa que pegou os anacos da compañeira. Como lle faltaba un óso, puxo no seu lugar un anaco da planta das fabas. Logo, cortou para ela un traxe de carne e coseulle un abrigo de pel. Finalmente, cantoulle un conxuro ata que Filipa falou de novo. Agora, as dúas velliñas aínda viven xuntas e cando teñen fame de aventuras soben ao ceo e danse unha enchente.
Álbum que combina o texto creativo, que xoga co absurdo dende a fantasía, con ilustracións amable e humoristicamente chamativas.