Cando a Marco lle caeu un dente ao cumprir seis anos, o ratiño deixoulle un agasallo debaixo da almofada. Pero, como tiña fame, foi á despensa, probou o queixo e os chourizos -que sabían ben mellor que as raíces e as patacas crúas da terra- e instalouse na casa, esquecendo o seu oficio de repartidor de regalos. Durante o día estaba todo tranquilo, pois a familia andaba fóra. Só tiña que ter coidado do gato, pero este comía croquetas de bote e xa non sabía que o mellor alimento dos gatos son os ratiños.
Até que a mai de Marco descubriu a súa existencia pola comida roída na despensa. Entón Marco inventou unha dor de barriga para non ir ao colexio e que o viñese coidar o avó. E chegou a un acordo co rato: sería o seu hámster, meteríao nunha gaiola, deixándoo saír cando estivesen sós, e unicamente comería o que lle levase el, sen roubar na despensa. Aínda que aos pais lles pareceu algo raro o hámster moderno de Marco, aceptaron que quedase na casa baixo o coidado do rapaz. Quen, por certo, cóidao tan ben que por iso hai moitas nenas e nenos que xa non reciben o agasallo cando lles cae un dente...
Edición especial en formato álbum a cores, que se vendeu conxuntamente co xornal do día.