O vello reloxo do Concello tiña cada vez máis avarías, pois a unha non facía máis que chorar porque as outras horas non falaban con ela por estar moi ocupadas. Por iso un día decidiu marchar coñecer mundo.
Á noitiña recolleuse no taller dun reloxeiro. Alí coñeceu a Saturniño, un reloxo de parede antigo; a Gumersindo, un de peto; a Cachirulo, o de cuco que pretendía que o seu paxaro asubiase en vez de seguir sempre co seu cucú, e a un reloxo dixital, só con números e sen agullas. Quedou durmida onda eles e acordouna Repenique, o espertador, que lle explicou que é unha hora importante, xa que á unha saen os nenos da escola e a xente vai comer, polo que debe volver ao seu reloxo. Convencida, marchou a unha para alá e chegou faltando segundos para a súa hora. Todas as agullas a recibiron moi contentas.
E nese momento en toda a vila escoitouse UNHA gran badalada.