Mon Daporta: Un becho estraño
Ilustracións de Óscar Villán
Ed. Faktoría K de Libros. Vigo, 2009

Conta o narrador que atopou un becho estraño, coa feitura dun ovo: gordo arriba, abaixo fraco, con dous pés e un longo rabo, brazos cos dediños estirados, nariz en lugar de embigo, dous olliños sen pestanas nin cellas e sentábase nas orellas. E isto visto do dereito resulta ser un rato, a quen un raio deixou desorellado, co susto pechou os ollos, levoulle o vento o nariz, a chuvia borroulle brazos e mans, co medo perdeu os pés e o rabo, e quedou pelado como un ovo, que é un becho estraño...
Libro en cartón duro con texto mínimo rimado e un ritmo marcado por versos de oito sílabas. Seguindo a fórmula dos chamados "contos sen fin", ten unha estrutura circular na que avanzan parellos o texto e a ilustración ata un final que se transforma no comezo, xirando o libro. Cun traballo de ilustración mínimo pero dobremente atraente polo impacto visual e o xogo da lectura circular.