Tanta Miga vive nunha pequena e fermosa vila mariñeira; alí vai á escola, monta nas dornas e co bo tempo toma o sol e báñase no espigón. Avelino é un vello pescador que xa non vai ao mar e deixa que os nenos xoguen na súa casetiña, onde gardan lambetadas, cantan, bailan e fan teatro. Cando celebraron o aniversario de tres amigos da panda, a rapaza, como é moi lambona, zampou tantos doces e tortas que se quedou durmida. Ao espertar tanto lle medrara a barriga que non foi quen de saír pola porta. Pero os amigos atoparon a solución: cantaron e ela bailou, ata que pola porta lle entrou a barriga. Entón puido saír.
Edición en formato álbum con ilustracións a toda páxina e a cores.