En xullo, en Compostela, hai moitos carruseis, pois celebran as festas do Apóstolo Santiago. Un deles é de Brais, que ten dous gatos irmáns de nomes Sar e Sarela, como os ríos que cruzan a cidade. Un día que se sentaron ao pé dos cabalos da Fonte de Praterías, Sarela quedou durmida e tivo un soño fantástico:
Sar levouna a descubrir as gárgolas que os canteiros colocaron nas cornixas dos tellados de Compostela como defensa contras os inimigos, sobre todo a auga. Así atopan dragóns de terrible dentadura, outro con patas de león e cara de aguia, un peixe mariño monstruoso, un lince capaz de ver a través das paredes, a serpe con peteiro, o dragón que devora homes lambéndoos, o que é capaz de matar coa mirada, que se pode admirar, entre outros moitos, no Hostal dos Reis Católicos...
Entón Sarela espertou, asustada, e volveron para o carrusel, onde viron con asombro que os monstros dos tellados daban voltas cos nenos ao lombo mentres expulsaban pola boca a auga da choiva que caera aquela tarde sobre Compostela.