Breixo recibe entre o seu correo unha botella sen remite: chamada desesperada dunha muller que leva seis séculos agardando polo seu "amigo" na illa de San Simón. Como vén con retrato e a moza é xeitosa ordena poñer rumbo á illa. Polo camiño, a Enciclopedia do Loro permítelle informarse sobre a lírica medieval galego-portuguesa. Por fin chega e aínda que xa está algo murcha a muller por tanta espera sen lle vir o pillabán do célebre xograr Mendiño, cóntase que aquilo foi o "comezo dun gran amor".
Espléndida edición conmemorativa do Día das Letras Galegas con estoxo e outros dous libros sobre os xograres homenaxeados.