Hai moitos anos, nun remoto país un home e unha muller desexaban ter un fillo, pero non vían cumprido o seu desexo. Estaban tristes, polo que cando un día a muller lle pediu pexegos do xardín veciño dunha bruxa malvada, no que ninguén se atrevía a entrar, o home saltou o valado e tróuxollos. Tamén as noites seguintes. Nunha destas, sorprendeuno a bruxa. Ofreceulle cantos pexegos quixese a cambio de lle entregaren un fillo, se lles nacía. Aceptoulle. Pasado un tempo tiveron unha nena, que a bruxa levou. Púxolle de nome Rapunzel. Fermosa, aos quince anos, pechouna nunha torre sen porta nin escaleira. Para visitala, mandáballe botar a súa trenza dourada pola fiestra e gabeaba por ela.
Un día que o príncipe paseaba polo bosque, sentiu unha fermosa voz procedente da torre e, axexando a bruxa, viu como subía. Á noite subiu el e pediulle de casaren a Rapunzel, que o aceptou. Escaparía tecendo unha escada de seda. Pero a bruxa descubriunos, agachou a Rapunzel nun lugar deserto, agardou na noite ao príncipe, soltoulle a trenza e fíxoo caer nuns espiños, que o deixaron cego. Vagando polo bosque, deu con Rapunzel, que chorou, e dúas das súas bágoas foron aos ollos del, curándoo. Marcharon entón para o seu reino e viviron felices.
Edición esplendidamente ilustrada desta adaptación do conto clásico de J. e W. Grimm