Kiko Dasilva: ¿Que contan as ovellas para durmir?
Ilustracións de Kiko Dasilva
Col. Árbore. Os Duros, 1. Ed. Galaxia. Vigo, 2004

Bee (con dous es porque tiña dous anos) era unha ovella branca coma o leite que vivía nun rabaño de ovellas negras coma o café. Traballaban para un pastor que todas as noites se deitaba debaixo dun valado e facíaas saltar por riba del para contalas e quedar durmido. Un día Bee preguntouse que contarían as ovellas para durmir, pero ninguén do rabaño tiña a resposta. E con herba fresquiña para a fame e unha pouca neve por se tiña sede, emprendeu a viaxe na súa procura.
Preguntoulles a un sapo moi gordo que comía moscas nunha poza, a un gato que ceaba un rodaballo nun carballo, a un porco que se enzoufaba na lama, a un can con piollos a rañarse, a un lobo feroz que desplumaba unha galiña e a unha vaca que enchía botellas de leite para o mercado. Mais ningún sabía a resposta. E todos contaban ovellas para soñar. Logo de atopar a cada un, intentaba durmir contando neles, pero acababa espertando. Seguiu camiñando até caer rendida do cansazo. Entón viu uns valos parecidos aos que saltaban as súas compañeiras de rabaño, pero brancos e con franxas vermellas. Gustáronlle, tombouse debaixo dun deles e comezou a contalos. De pronto, empezaron a saltar por riba homes vestidos con pantalón curto e camiseta. E contando neles quedou durmida.
Así foi como descubriu que as ovellas contan atletas para durmir.
Edición en formato álbum con ilustracións a toda páxina e a cores.