Segundo lle contou un vendedor de chourizos ao tendeiro, unha moza moi fermosa paseaba un día pola praia cun papaventos cando de súpeto viu un porco deitado nunha toalla tomando o sol. Coa sorpresa soltou o papaventos, que pegou a voar e ela a chorar de tristeza. O porco, dun pinchacarneiro, conseguiu recuperalo e entón ela, emocionada e agradecida, sen decatarse deulle un bico nos fociños. O bico librou un fermosísimo príncipe do feitizo dunha bruxa á que non lle quixera dar o seu amor e só a moza podía desporcalo. Disque agora pasean felices pola praia, romántica ela, porcino el agarrando o papaventos. É doado concluír, pois, que a vida dános sorpresas: algúns porcos son homes e ás veces pasa ao revés; por iso se ves pola praia algún "tipo ordinario, agresivo e descortés/ non te achegues e lisca / ¡xa sabes que pode ser!".
Historia en verso rimado na que as ilustracións xogan un destacado papel.