Conxunto de vinte poemas, centrados tematicamente arredor dun motivo concreto, como indica a propia nominalización dos títulos, próximo ao territorio da infancia.
Os elementos da natureza está animados: o sol báñase espido e non pilla catarros, as estrelas buscan a lúa durmida pois teñen medo, as ondas tamén se cansan... Os animais poden ser uns bos compañeiros e tampouco son tan diferentes dos humanos: o siamés ten medo subido ao tellado e rescátano os bombeiros, o xurel e a dourada cansan, a bolboreta ponse á sombra porque lle molesta o sol, a gaivota pía coa fame, o paxaro pousa nas flores pois quere ter cores como as bolboretas, o gato rouba os bocadillos, a moderna balea pretende aprender a andar en bicicleta, un dinosauro namórase do mar. Ademais, non faltan as celebracións: o Carnaval, os días da semana ou as cartas que trasladan sentimentos. Son poemas como os remedios caseiros da avoa para as dores, a parra á sombra baixo a que descansa o avó ou a fortuna dun día de lectura cando chove fóra.
O estilo, limpo e sinxelo, combina a visión tenra co xogo metafórico. A edición alterna as páxinas de texto coas ilustracións a cores feitas por rapaces.