Nun planeta agochado tras da Lúa, vive Pipo, un pastor de xoaniñas, que por certo dan un leite con sabor a amorodo merengado que moito lle gusta ao rei Luón.
Pipo ten un soño: viaxar onda as estrelas. Un día fáiselle realidade gracias a Estela, unha estrela brillante e acróbata, que o leva montado no seu lombo ao mar de estrelas, onde milleiros delas nadan e bailan felices; a un planeta branco como a neve -que por certo resulta ser un fato de ovellas-, onde un carneiro pouco hospitalario case lles derrama a excursión; e a outro encarnado como unha cereixa onde coñecen un verme moi fachendoso.
De volta no seu reino atopan a Luón enfadado porque o pastor abandonara o rabaño. Entón Estela tamén o leva de paseo ata un planeta agrisado, con dous únicos habitantes que viven enfrontados nunha guerra interminable. Regresan horrorizados. Porque Luón e Pipo sempre serán amigos. Por certo, Estela marchou, aínda que se cadra algún día volvemos vela brillar...
Espléndida edición na que o traballo de ilustración desempeña un papel decisivo.