Érase un pescador que vivía nunha chabola preto do mar. Un día de mar limpo e claro, saíu da agua un enorme rodaballo, que lle falou e lle dixo que non era un peixe, senón un príncipe encantado. Devolveuno ao mar. Cando o soubo a muller, ordenoulle que volvese onda el e lle pedise en pago pola liberdade unha casa para eles. Foi e, co mar revolto, explicoullo: o peixe concedeulle o desexo. Pero non parou aquí a cousa, pois a muller non se conformou e reclamou do rodaballo: primeiro un castelo, logo ser raíña e despois Papa. Nada contento, pero con temerosa obediencia, cumpriu os encargos o mariñeiro, regresando ao mar (axitado primeiro, picado logo e embravecido despois) e de volta na casa atopouse cos desexos da súa muller satisfeitos.
Pero nin así lle foi abondo a ela: ocorréuselle que quería ser Deus. Volveu o mariño ao mar, con treboada e ondas enormes. Ante esta nova petición, o peixe respondeulle: xa podes regresar, pois na chabola volve estar.
.