Unha grande ouriza ten tres pequenos ourizos cachos: Espi, a máis teimuda e espelida, o preguiceiro Cacheiro e Pugón, o máis rosmón de toda a redonda. Ao que acaban de comer, xa empezan a se queixar, polo que ela decide levalos ao xardín de Anselmo para que se farten de larpeiradas. Cando a lúa asoma no ceo van os tres de excursión, en fila india detrás da mai. Descobren a lúa bambeándose divertida nunha poceira de auga, as gargalladas ruidosas dos luceiros e as árbores a remexerse coas cóxegas do vento. Até que chegan ao gran río gris, que rabuña nos pés e só se pode atravesar unha vez que pasen as luces malísimas, moi rápidas e facendo moito ruído. Atravésano con moita présa e no xardín de Anselmo comen froita moi rica. A partir desa noite, cada día cruzan o gran río gris para cear con fartura no xardín. Unha noite que mamá ouriza ten catarro, van eles sós. E, sen facer caso dunha luz que vén lonxe, Espi ponse a cruzar... e cataplumm!: atropélaa unha nena en bici que pensa en levar o cachourizo co seu bonito fuciño. Pero a mai dille que o deixe marchar coa súa familia.
Edición especial en formato álbum a cores, que se vendeu conxuntamente co xornal do día.