"Este libro é unha esixencia, unha chamada ao sentido común feita coas mans e as palabras de quen adoitan ser espectadores pasivos da Historia, os nenos e as nenas, que viviron de forma intensa a catástrofe ecolóxica producida polo afundimento do Prestige, aquel triste 13 de novembro do 2002, e levantaron unha marea reivindicativa coas súas mans, coas súas voces. Esta é unha pequena mostra de tanto sentimento, de tanta rabia, de tanta esperanza. Este é tamén un proxecto solidario, porque o 15% do prezo de venda será dedicado a fornecer de libros as bibliotecas das escolas máis afectadas pola catástrofe. E cando amanine a treboada, as palabras e as cores dos nenos galegos seguirán a ser unha esixencia, unha chamada ao sentido común: ¡Que non pase NUNCA MÁIS!"
Poemas, xogos de palabras, trabalinguas, adiviñas, o encrucillado dos voluntarios ou a carta a un tío emigrado compoñen este berro de dor e esperanza dos nenos e nenas de Galicia contra o desastre do chapapote e a incompetencia na xestión do Prestige. As colaboracións de cincuenta colexios e centos de rapaces e rapazas, cos seus textos conmovedores e os seus fermosos debuxos, desde os máis elementais aos que mostran a súa desbordante creatividade artística, compoñen este libro histórico, que sempre será un rompente contra a desmemoria.
     A lúa é branca;
     o sol, amarelo;
     a herba, verde;
     e o mar...
     ¿De que cor é o mar?