Libro en formato acordeón, despregable nunha longa saba cartonada, estruturado en dúas caras ben diferenciadas. Por unha banda, unha ilustración única retrata unha escena de rúa con adultos e rapaces xogando, comendo turrón ou cantando os reis nun clima de ledicia colectiva na que non poden faltar os Reis Magos, o Belén ou un festival de panxoliñas. Na outra cara, aparecen con tipografía caligráfica diferentes palabras relacionadas co tema, acompañadas de senllas representacións gráficas, ademais dunha páxina de preguntas sinxelas que reclaman unha relectura visual.
Por último, o xogo participativo inclúe a localización do pimpín que dá nome á colección, mergullado no debuxo panorámico.