O can Ulises trae un novo caso á axencia de detectives que comparte con Uxía e Brais, pois desapareceu a Virxe do século X da igrexa de Camanzo. Comezan as pescudas os tres amigos. Seguindo o rabo dunha túnica que entrevén, van á igrexa de San Miguel de Goiás, á de Donramiro, ao Santuario de Nosa Señora do Corpiño, pasan pola Serra do Candán, a Fervenza do Río Toxa, o Mosteiro de Carboeiro e na igrexa de Ansemil conseguen falar coa estatua, que lles di que soamente pretende dar un paseo turístico. Acompáñana deica a Ponte Ledesma, o edificio da Fundación Neira Vilas, o Encoro de Portodemouros, o Pazo de Borraxeiros, os pendellos medievais de Agolada e chegan mesmo ao Monte Farelo. Como xa viron o máis interesante, a estatua, arrepentida de terse escapado, volveuse colocar no seu lugar na igrexa. Deste xeito, os tres amigos coñeceron a comarca do Deza.
A edición combina a fotografía dos espazos coa ilustración, na que eles son protagonistas.