Selección de contos populares adaptados polo Colectivo Crisol.
"O mintireiro" narra a historia dunha raíña que anuncia que lle concederá un premio á persoa que lle conte a maior mentira. Un pai de familia decide probar sorte e cóntalle á raíña a súa vida e ela considera que é a maior mentira que escoitou nunca e entrégalle un montón de moedas de ouro.
En "O paxaro de ouro" relátase cómo un rei quere investigar quen lle rouba as mazás portuguesas e pide axuda aos seus fillos. Os dous maiores fracasan e o menor descobre que o ladrón é un paxaro de ouro. O rei empéñase en conseguir o paxaro e os dous fillos maiores fracasan novamente, mentres o pequeno regresa ao palacio co paxaro, o cabalo de ouro e a princesa dos cabelos de ouro.
En "Xaniño espido, pelica de ovella" cóntase a historia dun neno pobre que vive coa súa nai nunha cabana e que sempre anda espido. Despois de axudar a un xigante, unha vella e un vello e de conseguir tres regalos, vaise a percorrer o mundo e, gracias á axuda dos tres obxectos, consegue casar cunha princesa.