Trátase de tres breves relatos de carácter popular que poden servir para que os máis pequenos coñezan algúns relatos tradicionais.
En "Martuxiña" cóntase o sucedido a unha rapaz moi valente que por amor ao pai vai no seu lugar a servir a El-Rei. A pesar de tomar andares e xeitos de home, un compañeiro seu ten a desconfianza de que é unha muller e faille unha serie de probas para confirmar a súa dúbida. Véndose incapacitada de realizar a última proba, a rapaza foxe pero el perséguea e finalmente acaban casando.
En "Brancaflor", a protagonista interrompe a voda de Xan para alegar que é o seu mozo e pedir licencia para relatar un conto, que en realidade, non é máis cá súa historia. Narra así como un mozo xogantín apostara a súa alma e a perdera, sen saber que o seu contrincante era un meigo. Aconsellado primeiro por unha vella e logo por Blancaflor, que era a filla máis nova do meigo, proporalle a este redimir a súa alma a cambio de traballos. Realizados estes, os dous mozos fuxirán e serán perseguidos polo meigo e a súa muller, que lle botará unha maldición, pedindo que calquera persoa que lle dera unha aperta ao rapaz faría que esquecera a Brancaflor. O rapaz recibiu dita aperta e a maldición cumpriuse. Cando Brancaflor remata a súa historia, Xan lembra todo e decláraa a súa muller.
En "Catro irmáns con oficio" relátase como catro irmáns, aconsellados polo seu pai, van polo mundo en busca de oficio. Aos tres anos e segundo tiñan acordado volven a se reunir co pai. Chegada a noticia de que a filla do rei fora raptada por un dragón, conseguen salvala, pondo en práctica todo o que aprenderan na etapa de formación dos seus oficios. Como os catro non poden recibir o prometido polo rei, que era a man da súa filla, ofreceralles moitos cartos e un lugar na súa mesa.