María xa ten dous anos, seis meses e un día. E xa é maior porque sabe subir soíña as escaleiras da casa, comer con culler e garfo e falar sen parar. Pero cando pide que lle deixen prender o lume da cociña, non a deixan porque é perigoso e non é maior abondo; tampouco pode andar coas tesoiras nin montar na bicicleta estática nin conducir o automóbil nin pintar ao óleo nin facer a instalación eléctrica do belén nin cargar coas bolsas da compra. E, claro, enfádase, ¡porque xa é maior!
Pois claro que é maior: para axudar a poñer a mesa, recortar as mariquiñas coas tesoiras pequenas, andar na súa bicicleta polo parque, tocar o claxon do coche, pintar un cadro coas súas pinturas de cores, colocar as figuras do belén ou axudar dando as cousas para cociñar. E todo iso faino moi ben ¡porque xa é maior!
Edición en formato álbum con ilustracións a cores e a toda páxina.