En sinxelos pareados e presentados cun traballo de ilustración que combina o minimalismo das figuras inxenuistas, ás veces co recurso a referentes fotográficos, cun fondo colorista que crea un ambiente amable, explícanse algunhas características elementais do lobo nunha linguaxe sinxela. Así:
O lobeto non medrou nun niño senón nunha lobeira, pero agora anda medio cego pola pedrada dun crego. Como no bosque non hai comida non lle queda máis saída que baixar á aldea e trabar calquera animal. Antes, o monte era perigoso. Agora non vive o oso nin case ningún animal, pero el vive con medo e sempre de fuxida para escapar da batida.