Na casa de Laura hai ratos, que ela escoita as súas carreiras nocturnas polo faiado desde a cama. Mesmo un día un ratiño cruzou veloz pola cociña mentres os pais xantaban e agachouse detrás da neveira, onde non deron con el; logo, cruzou a sala e acubillouse detrás do aparador e non o venceron nin a zapatilla do pai nin a mai coa vasoira. Colocáronlle unha rateira con queixo e unhas bólas de veleno por ver de pillalo. Mais Laura esa noite desfixo as trampas, deixándolle o queixo e uns anacos de pan no centro da cociña. Pola mañá o ratiño comera todo. Agora a nena soña con facerse amiga do rato. ¡Habíano pasar ben xogando os dous!
Colección para primeiros lectores con ilustracións a cores e a toda páxina na que o texto se reproduce en letra manuscrita e mais en maiúscula.