Conta a narradora que vivía nun regueiro tranquilamente, pero un día tivo que afastarse fuxindo dun crebaosos. Entón pensou en coñecer mundo. Metida entre patacas, nun saco, foi dar a unha casa. E nela está moi a gusto. O pai de familia dixo que era un galápago femia e bautizárona como Claudina.
É unha familia moi afeccionada á música, que mesmo practican. Ela tamén lle colleu afección: sabe cancións e recoñece sinfonías.
Móvese por toda a casa, feliz e ben tratada. Aparece e desaparece cando lle peta. Para facela saír, poñen un disco de flamenco, que saben que lle gusta (tamén o rock).
Agora que chegaron as chuvias do inverno está agachada para que non a esperten. Na casa están tristes pois non a atopan. Gárdalle, lector, o segredo e dirache onde está. Aquí, neste libro da súa historia.