Cando unha badalada da Berenguela lle indicou a Sara que era hora de comer, deixou de xogar cos amigos e pasou pola Praza das Praterías. Alí, Branco de Cores, o cabalo que se alimenta dos soños dos rapaces que visitan Compostela, chiscoulle un ollo para que montase dacabalo del.
Levouna á gran sala do Pazo de Xelmírez, onde recende a empanada dun dos personaxes de pedra; pasaron por onda o Gato Negro, coas súas tapas de orella de porco; na praza de abastos viron o Asasino perseguindo un galo, que ha guisar con arroz para o menú dos estudantes; pola Praza de Mazarelos entrou un carro de bois con bocois de viño para repartir polos bares de Santiago; na carballeira celebrábase a típica feira e as dúas Marías comían o polbo da Aurora de Carballiño con Santa Susana e Rosalía de Castro, que baixara do seu pedestal para unirse a elas; viron saír da librería Galí ao xornalista compostelán autor do libro coñecido polo seu alcume, o Picadillo; pasaron pola pensión "La casa de la Troya", co seu famoso caldo que revive a un morto; atoparon ao indio Gran Lucky, que gañaba o pan facendo de estatua humana na Praza do Obradoiro desde que pecharan a cafetería na que traballaba. E volveron ás Praterías, onde a Berenguela repetía a badalada que anunciaba a unha da tarde. Agardábaa a súa nai, que a levou comer.
Álbum que se ambienta nos espazos representativos da cidade.