No Limiar, Alicia L. Pardo, mestra, presenta a experiencia e as circunstancias de creación do libro, que incluía máis traballos a partir da visita real da pita.
A voz narradora da primeira persoa conta a historia de algo máis de dous cursos nun colexio da montaña luguesa, onde se viu alterada a normalidade pola visita dunha pita rubia. Sentíndose a gusto, pois o carpinteiro estaba amañando os furados para que non pasasen tanto frío, puxo tres ovos. Desde ese día, a galiña non deixa de visitalos, de tal modo que, aínda que ela xa se instalara na papeleira, fixéronlle un niño. O problema foi que a dona do animal reclamou os ovos, que eles aproveitaban para facer tortillas para as excursións; mesmo decoraron as cascas. Ademais, os cans intrusos, un avizolo e un parrulo foron os seus inimigos, que ela deu vencido. Mesmo despois das vacacións de verán, a pita volveu á escola para poñer. Era o xoguete de todos, aínda que ás veces tiñan que mandala calar para poder traballar.
Con letra caligráfica, debuxos e retratos dos alumnos coa insólita compañeira, e a naturalidade do galego dialectal, recóllese esta experiencia real nun colexio da montaña luguesa de Os Ancares, desde abril do 75 ata xuño do 78. Logo chegou a concentración escolar, e con ela a morte dun colexio que se fixera habitable co esforzo dos veciños.