O coello Federico saíu facer unha excursión polo bosque. No medio da corredoira e cortándolle o paso, atopou un coello negro forasteiro que non lle devolveu o saúdo. Por ver de apartalo, deulle unha labazada, pero quedoulle a man pegada na cara do coello. Logo, a outra. Deulle entón cos pés, que lle quedaron presos tamén. Entón saíu o raposo de detrás dun carballo: tendéralle unha trampa cun monicreque. Cando o levaba ao lombo para comelo, Federico díxolle que podía cociñalo, colgalo, afogalo ou tiralo por un cavorco, mais pediulle que nunca se lle ocorrese chimpalo nunha silveira. Por amolalo máis, o raposo guindouno entre as silvas.
Entón Federico saíu rindo: as silvas non lle fan dano, porque é coello de monte nacido nunha silveira. E o raposo quedou con fame e moscas ao rabo.
Álbum que constitúe a segunda entrega desta serie inspirada na tradición da literatura popular, que comezou con O coello Federico.