Conta Ramón dunha tarde soleada na que foi xogar ao xardín da casa de Tomás. O pai, moi gordo, pegou a durmir a sesta na herba pedíndolles que non o molestasen cos berros. Os catro nenos xogaron a un concurso hípico de obstáculos, saltando por enriba da súa enorme barriga. Unha vez Paula caeu, pero o durminte non espertou.
Entón seguiron: o bandullo era unha excepcional cama elástica, as pernas facían un bo tobogán, subir por elas era como practicar alpinismo... O pai non espertou, pero ao día seguinte estaba mallado. Colleríao a friaxe nos cadrís pois "estes días refresca polas tardes".