Consta este libro dun conxunto de poemas agrupados en catro apartados: "Dez parraguesas", "Dez xoaniñas", "Dez vagalumes" e "Dez abellas". En cada un dos poemas repásanse os números ata o dez, xogando coas actividades dos diferentes animais que interveñen nas historias.
Os versos van acompañados de grandes ilustracións en branco e negro nas que se visualizan as distintas tarefas dos animais protagonistas e están escritos en letra manuscrita.
Caracterízanse por presentar elementos das cancións populares infantís, nas que a musicalidade vén proporcionada pola rima e permite a memorización das series lingüísticas.