Xabier P. Docampo: De cores e amores
Ilustracións de Xosé Cobas
Col. Árbore. Ed. Galaxia. Vigo, 2005

A páxina é un espacio en branco polo que se moven as pingas de cores, baixo as que paira un texto mínimo. En perfecta simbiose, as letras e as pingas explícannos as cores diversas do amor. Porque unha pinga soa non é nada, e outra soa tampouco, até que un día se encontran empurradas por unha forza que se chama amor e abrázanse. Todas precisan con quen se abrazar e do seu encontro xorde a vida: o sol, un ceo gris e un ceo azul. Cando todas foxen vén a noite e cando volven traen paxaros.
Deste xeito, as pingas mínimas compoñen un mundo de posibilidades, para a imaxinación e para o goce estético.
A orixinal concepción, moi limpa e atractiva, permite unha sinxela lectura visual para as primeiras idades e deixa un espacio aberto para a imaxinación e a creatividade.