Rabilete, Gatillo, Pistón, Portapeza, Firmegarra e Seguerrastro son uns nenos do Courel que gustan de cachear as covas dos arredores. Un día deciden subir ao cubil do xabarín. Cando acaba o camiño e comeza a bouza, teñen que extremar as precaucións pois en calquera momento pode aparecer o xabarín enfurecido disposto a defender as súas crías. Avantan con pés de la e cando están chegando ao cume, xorden o xabarín macho e a femia a todo correr, impoñentes e irados, que pasan a carón dos rapaces, agachados nun rebolo de canas baixas, sen velos. Co medo aínda no corpo, os amigos regresaron, apurados e algún deles co pantalón mollado polo susto. Por iso logo nunca contaron esta aventura, na que sentiron na maxestosidade da Serra do Courel o poderío do xabarín, que mesmo ten asustado a cazadores.
A edición inclúe un pequeno vocabulario no que se aclara o significado de termos de cativa difusión fóra do territorio lingüístico no que se sitúa a acción, na liña do léxico característico da obra do poeta do Courel.