Partindo dun conto orixinal de Costa de Marfil, preséntase unha parábola sobre a mentira. Como a hiena se riu da lebre cando esta lle dixo que a cousa que máis doe no mundo é a mentira, esta decide que o mellor xeito de convencela é cun caso práctico. Primeiro pídelle que a morda nun pé. Aínda que a lebre berrou de dor e desapareceu coxeando, en poucos días a ferida curou. Pero unha mañá a lebre deixou feito un bo "pastel" á entrada do palacio real. Para descubrir o culpable de semellante provocación, o rei mandou chamar a todos os animais do poboado. Ningún se recoñeceu como autor, polo que houbo que lles preguntar ás moscas, auténticas especialistas na materia, que, postas de acordo coa lebre, acusaron á hiena. E como ninguén creu a súa inocencia, fuxiu do poboado co rabo entre as pernas.
Aprendeu así que, de todas as feridas, a mentira é a que máis doe
Como é característico na colección, o creativo traballo de ilustración preséntase en formato álbum a dobre páxina e a cores.