Colección de catro contos ambientados na época de Reis e tres relatos no tempo de Nadal.
En A mañá do monstro conta o narrador que á noite máis fermosa da súa vida sucedeuna a mañá máis espantosa: un monstro perseguiuno pola casa adiante cegándolle un ollo e arricándolle un brazo e unha perna entre arrepiantes gargalladas e palabras incomprensibles, até que cando está agachado debaixo da cama ocorre o milagre: a nai bérralle ao rapaz que deixe en paz o robot ou os Reis Magos nunca máis lle traerán agasallos.
A Noite de Reis da Princesa presenta a unha princesa que está esperta cando chegan os Reis Magos cos agasallos e négase a durmir sen velos antes, polo que Baltasar cóntalle o conto da princesa que se nega a deitarse sen ver antes os regalos. Entón, queda durmida. E ao día seguinte di que o mellor agasallo foi o conto que lle contou o rei de noite.
Marquiños quería un balón trata dun rapaz que desde que aprendeu a escribir sempre lles pediu aos Reis Magos un balón de Regulamento sen que ningún ano llo trouxesen, polo que cando cumpre nove anos vólveo pedir coa ameaza de que se non llo cumpren o desexo nunca máis crerá neles. Déixanlle unha esfera terrestre, coa que pode xogar como se fose unha pelota: seguramente será o balón regulamentario do próximo Campionato do Mundo e por iso llo deixaron os Reis.
Xandro e Tomé son dous rapaces que se coñecen na parada do bus escolar. O primeiro é fillo de pais ricos, o segundo só ten de agasallos de Reis roupa nova. Ese ano, o Día de Reis Xandro vai compartir con Tomé e os seus amigos os seus regalos: por primeira vez en moitos anos, gustoulle de verdade xogar cos agasallos que lle trouxeran os Reis Magos.
A viaxe de Fátima é a dura experiencia dunha moza de dezaoito anos, viúva e a piques de ter un fillo, que escapa do seu país en guerra para o rico Norte, onde logo da travesía do mar a policía descobre a súa lancha e captúraa, mais na praia mesmo dá a luz a noite do 24 de Nadal. E unha nena de catro anos que ve o recén nado, di que acaba de nacer o Neno Xesús e é negro.
O home que reconstruía a súa casa refire o empeño dun home maior, viúvo e sen fillos, en reconstruír a casa malia a que en dous anos sucesivos, o 24 de decembro, un dos exércitos enfrontados derrubouna e requisoulle os animais para alimento dos soldados como contribución solidaria á causa. Cando o terceiro ano se dispon a refacela con resignación por terceira vez, un capitán di non comprender ese empeño pois a guerra non rematou e non é seguro que vaia seguir en pé até a paz. Mais un soldado novo di comprender menos o empeño dos xefes militares en continuar a guerra cando o que conquistan un ano pérdeno ao outro.
O señor Scrooge tiña razón é o que lle contesta un tío que sempre desaparece polo Nadal ao seu sobriño, que lle reprocha a súa ausencia e compara co personaxe de Dickens polo seu odio a tales festas con elementos de hipocresía social. Pero, a partir dese día, cada Nadal envíalle unha postal desde os máis diferentes lugares do mundo cun pequeno texto: "Non lle fagas caso ás pantasmas de Nadal".