Ana Mª Fernández presenta varios contos que teñen como protagonistas algúns dos habitantes da selva de Longorongón.
En "A autoestrada misteriosa" narra os sucesos vividos por unha formiga desexosa de coñecer o que hai no mundo que decide marchar do seu formigueiro. Cando xa leva andado un bo treito e sente tremer a autoestrada pola que viaxa, foxe de contado para o seu fogar, ao decatarse de que tal autoestrada verde era unha serpe.
En "Un traxe de estrelas" relata o acontecido a unha xirafiña de pel limón claro sen manchas de tizón, cando prepara un plan cos seus amigos para alcanzar as estrelas e poder facerse un traxe. O plan non funcionará e vendo a lúa que a xirafiña se quedaba sen amigos e sen estrelas, teceralle un manto con mil luceiros.
En "O pelouriño da ra" conta a historia dunha ra que, ao ir por un oviño, convida a todos a tomar piña con menta. Coñecedora de que aos seus convidados o que lles interesa realmente é comer o seu oviño, cando estes se dirixen cara a ela, colle o seu fillo acabado de nacer e sobe a unha palmeira con el, para dicirlles dende alí que ela marcha de aventuras.
En "O parrugalipavo" refire o acontecido a unha pava, a unha parrula e a unha galiña que, tras serlles roubado o ovo que cada unha estaba chocando, deciden coidar un entre as tres para ver se así tiñan a posibilidade de que lles nacese un parrugalipavo.
En "Nilo e Dilo" o vello crocodilo Nilo pensa en buscar a alguén que o substitúa cando morra e por iso coida un oviño brillante. Así ao pouco tempo nace Dilo que, en vez de ocupar o seu cargo de xefe, marcha voando para o País dos Contos, onde decide quedarse a vivir.