Marisa Núñez: Cocorico
Ilustracións de Helga Bansch
Col. O. OQO Editora. Pontevedra, 2006

O pitiño Cocorico quere que a Mamá Galiña lle faga un biscoito e cando vai buscar leña para prender o forno atópase co temible Gato Pelado, o que miaña tres veces por cada bocado. Mais non come a Cocorico a cambio da promesa deste de darlle medio biscoito. Aínda que o biscoito é enorme, como é tan rico, o pito non resiste sen comelo todo. Pero entón chega o terrible gato reclamando a súa metade e por máis que nai e fillo se agachan nunha ola de barro, o felino dá con eles. Aínda que logo lisca atemorizado, cun dente partido e un ollo morado, crendo que cae a casa cando a Cocorico lle sae un grande espirro que rompe a ola.
Para celebralo, Mamá Galiña fai outro pastel, que cortan, esta vez si, en dúas metades: medio para el e medio para a mamá.
Adaptación a partir dun conto tradicional birmano editada en formato de álbum a cores.