No pobo de Choio os homes eran libres e felices pois por orde do seu rei Talento estaba prohibido o diñeiro. Labregos e mariñeiros intercambiaban os froitos do seu traballo e non existía a cobiza nin a envexa ao non ter ningún máis cartos que o outro.
Un día apareceu un home elegante que deu en repartir onzas de ouro: era o Capital. Sentíndose ricos, todos deixaron de traballar e comezaron a pasar fame. Non tardou o home en volver e vendeulles de todo ata que se lles acabaron os cartos. Entón mandounos traballar para poder comprar: pasaran a ser escravos do diñeiro.
Talento deulles a solución: converter o intruso en estatua de ouro dándolle a beber un zume especial. Así se libraron para sempre do Capital e volveu a xustiza e a felicidade.