Memoria da campaña institucional de promoción da lectura levada a cabo ao longo do curso escolar 1993-94 na que participaron 100 colexios galegos e máis de 12.000 rapaces e rapazas. Co lema "Un libro fai amigos" e un deseño-imaxe da campaña realizado por Uqui Permuy, distribuíuse entre os participantes diverso material publicitario (pegatinas, botes-lapiseiros, etc.). Os colexios seleccionados recibiron ademais unha pequena biblioteca literaria. Coa colaboración de nove escritores e tres ilustradores, publicáronse tres libros: "Tres triscadas", "Retrincos de historias" e "Aí está o conto", dirixidos cada un a un ciclo escolar. Celebráronse asemade encontros con autores e un concurso literario.
Reprodúcense a seguir os traballos premiados de Montserrat Machado Domínguez, Montse Ferraces Pinaque e Clara Nieto Caamaño, do Ciclo Inicial; Ana López Pardo, Pedro López Pérez e mais Elizabeth Vázquez Suárez, do Ciclo Medio; Soraya Ponte Rendal, Ángela Rieiro González e Pilar Moreno Carnota, do Ciclo Superior.
Recóllese así mesmo a relación de colexios participantes e os resultados estatísticos da enquisa sobre hábitos lectores.