Memoria da campaña institucional de promoción da lectura levada a cabo no curso escolar 1989-90. Desenvolveuse en cen centros de E.X.B. seleccionados de toda Galicia (dos que figura a relación). Envióuselles a todos eles un lote bibliográfico, distribuíuse o libro "Oito contos" e unha casete coa gravación de catro deles para utilizar cos cativos que aínda non adquiriran a capacidade lectora, con textos e debuxos orixinais de recoñecidos autores especializados en literatura para nenos e ilustracións de Manuel Uhía.
Convocáronse ademais concursos de contos e de expresión plástica nos colexios participantes, dos que se reproducen os tres traballos premiados en cada un dos tres ciclos, nas dúas vertentes do certame escolar. Péchase a edición coa presentación dos resultados estatísticos da habitual enquisa sobre hábitos lectores entre alumnos e profesores.