Os Bolechas van á casa da avoa á festa da Reconquista, que a cidade celebra disfrazándose con traxes da época, en lembranza da loita contra os soldados franceses que no ano 1809 invadiron Vigo. A avoa cóntalles o que lle dixo a súa avoa que lle ocorrera á avoa dela. Era peixeira. Namorouse dun soldado francés, con aquel uniforme tan rechamante, e el dela: foi un frechazo mutuo. Como na vila non había tropa para facerlle fronte ao exército francés, o alcalde rendeuse. Ela uniuse á resistencia contra os invasores, gabeando de noite polas murallas do castelo onde gardaban a pólvora, pero atopouse co soldado que lle gustara e púxose de palique con el ata o alborecer. Os rebeldes, sen agardar a que volvese coa pólvora, asaltaron a vila, que recuperaron o 28 de marzo, coa axuda dos barcos ingleses. Pero a avoa Carme e o seu francés Michel non foron con todos: estaban tomando baños xunto ás murallas da vila.
Agora os Bolechas xa saben do festexo da Reconquista polo que lle pasou á súa tataravoa.