Os Bolechas foron ver o curro de cabalos bravos a Gondomar, onda o amigo Camilo. O avó deste merca un poldro bravo, que intenta escapar cando o levan para a casa. Teñen que amansalo. Lévanllo a un domador inglés, para que coñeza un cabalo de carreiras puro sangue, campión de Ascot, e ao día seguinte o poldro xa se deixa montar. Pero non se sabe mover con elegancia: xúntano cun cabalo andaluz e ao día seguinte anda gallardo como o cabalo dun toureiro. Mais ten pouca forza nas patas, polo que lle cómpre a compaña dun cabalo ardenés e o seu adestrador, para que faga exercicios de musculación. Como segue a ser algo bruto, déixanllo a un mouro para que o eduque, pois ten un cabalo árabe. Lévano ao monte e comproban que o poldro xa non parece o mesmo.
Ali aparecen os catro adestradores: os seus cabalos andan despeiteados, rinchan como bestas bravas e cheiran a burruallo. ¡Semellan cabalos do monte!