Os Bolechas están en Cambre pasando uns días co amigo Antón, que lles ensina, facendo de guía, as ruínas romanas no museo. Ao saíren, Chispa dá chimpos como un carneiro e ládralles a varios animais (un esquío, un raposo, unha cobra, un ourizo, paxaros...) que se viñeron para onda a igrexa. Na ponte atopan máis, e bandadas de aves fuxindo para un tellado. Todos abandonaron a fraga e néganse a volver a ela. Algo raro pasa. Os irmáns acordan ir á fraga a ver qué puido asustar os animais todos. Entón descobren, estarrecidos, un crocodilo enorme. Eles, como os animais, foxen asustados. É moi raro, pois en Cambre nunca houbo crocodilos. Vanllo contar á mestra de Antón, que lles explica que ten que ser un crocodilo africano, que abandonou alguén ou liscou dun circo. O bombeiro Lois, co engado da carne logra meter o animal no carro. E mándano en avión á súa terra de África. Entón os animais regresan á fraga pois xa non teñen nada que temer.
E os Bolechas van á biblioteca e atopan un libro marabilloso: "O bosque animado", que conta precisamente unha historia de animais na fraga de Cambre.